Líndez garantiza la llealtá del grupu socialista a la FSA

Asegura que los parlamentarios encaren el congresu de manera individual

El voceru del Grupu Socialista na Xunta Xeneral del Principáu, Marcelino Marcos Líndez, garantizó güei la "llealtá" de los 14 diputaos d'esta formación tanto a la nueva dirección del partíu que salga del próximu Congresu como al Gobiernu rexonal que preside Javier Fernández.

En declaraciones a los periodistes tres la reunión de la Xunta de Voceros, Marcos Líndez, que formó parte del equipu que sofitó nes primaries al candidatu derrotáu, José María Pérez, aseguró que'l grupu parlamentariu como tal nun encara "de nenguna manera" el conceyu socialista del próximu fin de selmana.

Al so xuiciu, de cara al Congresu y "de manera individual" los parlamentarios que participen nel conceyu "tendrán la so posición" y el grupu siguirá trabayando "como hasta agora" con llealtá "a la dirección del partíu, al Gobiernu y a les resoluciones congresuales".

A entrugues de los periodistes respecto a la esistencia o non de contactos col secretariu xeneral electu, Adrián Barbón, Marcos Líndez nun se pronunció al considerar que ye "un tema internu".

Ensin plenu pol Congresu

El congresu rexonal de la FSA entama'l vienres, polo que los grupos apautaron güei suspender el plenu d'esta selmana.

Suel ser avezao nestos procesos, por cortesía parlamentaria. A la escontra manifestóse Podemos, que quería que Javier Fernández respondiere a les preguntes de la oposición, que tocaban esta selmana.

La formación morada asegura que lleva meses ensin dar esplicaciones. Foro y Ciudadanos plantegaron una solución intermedia pa que se celebrare la sesión del xueves, pero nun atoparon sofitu.