Llera asume’l control de la Sindicatura "con humildá y ganes de trabayar"

La Xunta acueye la toma de posesión de los nuevos síndicos del Principáu d’Asturies

El nuevu síndicu mayor del Principáu, Roberto Fernández Llera, aseguró qu’asume esta "grandísima responsabilidá con humildá, ganes y, sobre manera, cola idea de trabayar a esgaya pola xestión de los fondos públicos, que ye l’oxetivu y principal función d’esti organismu".

Ye, amestó, un "retu importante" nel que va poner lo meyor de so y nel qu’espera cuntar cola collaboración d’una plantiya de funcionarios "escepcional y d’altísima calidá", cola de toles entidaes fiscalizaes y cola de tola xente "porque la Sindicatura ye de tolos asturianos".

Fernández Llera tomaron esti vienres posesión del cargu colos otros dos nuevos síndicos, Eduardo Rodríguez y Manuel Fueyo, nun actu na Xunta Xeneral del Principáu que cuntó cola presencia del xefe del Executivu asturianu, Javier Fernández, autoridaes rexonales, locales y militares.

Cola so promesa d’acatar la Constitución y l’Estatutu d’Autonomía d’Asturies acabó cola anovación del órganu fiscalizador del Principáu que, dende la so constitución en marzu de 2005 tuvo dirixíu por Avelino Viejo, dempués de ser escoyíu dos vegaes como síndicu mayor.