Los comerciantes quéxense de desinformación

De momentu, los pequeños comercios, en xeneral, puen tar abiertos

Les midíes en materia de salú pública tomaes na tarde d'ayeri pol Principáu xeneró cierta confusión sobre qué tipu d'establecimientos tán obligaos a cerrar. De momentu, los pequeños comercios, en xeneral, puen tar abiertos, y non solo los dedicaos a alimentación o farmacies.

En dellos puntos d'Asturies la Policía Local informó pela mañana a los comerciantes de que teníen que cerrar a partir de les 12:00.

Dende la Unión de Comerciantes del Principáu d'Asturies recuerden que nel Boletín Oficial de la comunidá, nel BOPA, namái s'obliga a cerrar a les superficies comerciales de más de 2.500 metros cuadraos, sacantes los espacios dedicaos a la venta d'alimentos y productos de parafarmacia y hixene personal.

El restu d'establecimientos, el pequeñu comerciu de proximidá, como una tienda de ropa, pue abrir si cumple una serie de midíes de prevención.

Munchos comerciantes tiénenlo claro, anque eso nun torgó les duldes y la incomodidá xenerada polo difícil de venceyar la información que-yos taba llegando y lo asoleyao nel BOPA.