Los conceyos asturianos entamen a suspender actos colectivos

Uviéu pide a los ciudadanos qu'eviten dir a les oficines municipales

Conceyos asturianos entamen a suspender actos colectivos. Queden suspendíes, hasta nuevu avisu, les actividaes grupales que se lleven alantre n'edificios municipales en Grau.

El conceyu moscón tomó esta decisión en conociéndose’l positivu d'un vecín, infestáu nel colexu Masaveu d'Uviéu. Ye una midida preventiva pa protexer a la población de riesgu.

Esta midida afecta a edificios como'l polideportivu y les piscines, onde cada tarde hai entrenamientos de deportes n'equipu. Tampoco se van facer sesiones grupales na escuela de música, pero cualesquier pue dir a títulu individual a estos llugares.

Al marxe d'esta decisión municipal, suspendiéronse, tamién, otres actividaes como la catequesis, o'l viaxe a la nieve del C.P Bernando Gurdiel.

El Conceyu de Sotu'l Barcu suspendió tamién actividaes en centros municipales como la biblioteca, la casa la cultura, el polideportivu o'l Teatru Clarín. Amás prohibió tamién los mercaos selmanales de Sotu y L’Arena, y eventos que supongan les concentraciones masives de persones.

Nel bandu recuerden les midíes qu'encamienta'l Gobiernu pa evitar los contaxos, especialmente hixéniques y de cuidáu a mayores o a persones en grupos de riesgu.

El Conceyu d'Uviéu encamentó a los usuarios qu'eviten, na midida de los posible, evitar dir a les oficines y dependencies municipales, sacante les deportives, pa desaniciar l'espardimientu del coronavirus.

Nun comunicáu, el consistoriu recuerda que los usuarios disponen del Portal del Ciudadanu -https://sede.oviedo.es/- y amás puen pidir ayuda nel teléfonu 984 185 060.