Los conceyos empiecen a adoptar midíes de prevención escontra'l coronavirus

La Xunta Xeneral suspende la so actividá ordinaria una selmana

El Teatru Xovellanos de Xixón echa'l telón 14 díes. El coliséu del Paséu Begoña va tar zarráu al igual que los centros sociales de mayores municipales. Amás, Xixón suspende los cursos de la Universidá Popular y los xuegos escolares del Patronatu Deportivu.

Uviéu tien previsto estremar la llimpieza del moblame urbanu y de los autobuses y va dotar a la Policía Local d'equipos especiales de protección.

Siero decidió retrasar actos qu'impliquen grandes aglomeraciones de persones. Suspéndense toles actuaciones y reserves nel Auditoriu de La Pola, la casa la Cultura de Llugones y el Centru Cultural de La Fresneda. El mercáu de ganáu, amás, va suspender la so actividá dende'l llunes.

Grau suspendió les clases colectives en centros municipales, y la piscina y el polideportivu. Nel mercáu, hebo menos xente de lo avezao.

En Cuaña suspéndese la feria de la caza y la pesca prevista pal día 21, y el Conceyu de Valdés nun va celebrar actividaes públiques polo menos hasta'l llunes.

Avilés adoptó una serie de midíes pa torgar la tresmisión del coronavirus nes dependencies municipales y Llangréu anunció'l zarru de los centros sociales.

Los neños pequeños que güei nun tienen clas enllenen los parques

Colos neños ensin clas, los parques infantiles son la opción más recurrida nun día de sol como'l de güei. Madres, padres y güelos que curien de los pequeños de la casa.

Dalgunos pidieron el día o coincidió-yos na so xornada de descansu, anque la perspectiva de que'l zarru de los colexos s'allargue nel tiempu complica la situación.

Tamién p'aquellos qu'entá disponiendo de la opción de los güelos, nun quieren que queden a cuidáu de los neños, por ser los mayores un grupu de riesgu.

La Xunta Xeneral suspende la so actividá ordinaria una selmana

La Xunta de voceros del Parlamentu asturianu alcordó esti miércoles suspender l'actividá ordinaria una selmana como midida de procuru énte la epidemia de coronavirus.

Al términu de la xunta, el presidente de la Xunta, Marcelino Marcos Líndez, conseñó que nun ye una cuestión sanitaria sinón de "cortesía".