Los partíos preparen les sos enmiendes parciales al presupuestu autonómicu

Les cuentes van salir alantre col sofitu d'IX y del diputáu del grupu mistu

Güei a pesar de ser festivu, delles formaciones tán trabayando pa peracabar y concretar les enmiendes a los presupuestos de la rexón que tendrán que tar presentaes el miércoles.

El PP va presentar 80 en total, dalgunes dicen, lleven años na Xunta ensin qu'hasta agora se tuvieren en cuenta. Son, aseguren, incumplimientos d'Adrián Barbón.

Podemos tampoco concreta les sos enmiendes pero en llinies xenerales dicen que van dir destinaes a infraestructures, industria, cultura, sanidá y servicios sociales.

Ciudadanos apunta a proyectos concretos como la construcción del colexu en Nuevu Roces, a los que se sumen tamién IX y Foro. Estes dos formaciones coinciden amás en pidir fondos pal consultoriu de La Camocha.

La meyora de la sanidá pública, les llistes d'espera o la salú mental, van afitase en toles formaciones pa estes enmiendes. Queda concretar les cuantíes.

Dende Foro amás van pidir más dineru pa recuperar l'autopista del mar y pa la reunificación de sedes xudiciales.

Aceptaes o non estes y el restu d'enmiendes presentaes, les cuentes van salir alantre nel plenu del próximu día 30 col sofitu d'IX y del diputáu del grupu mistu.