Los policíes que detuvieron a David y Fadila conseñen qu’él reconoció'l crime

Solliñen que la ma d’Imran taba pertranquila nel momentu la detención

Los policíes nacionales que detuvieron, pola muerte del neñu de 21 meses atopáu nuna maleta n’Uviéu en 2014, a David F. y a la ma del neñu, Fadila C., coincidieron güei en que nel momentu de la detención fecha en Lleón l’home inculpóse mientres que la muyer taba "relativamente tranquila".

Estes fueron les afirmaciones calteníes na vista que se celebra n’Audiencia Provincial d’Uviéu polos dos axentes de la Policía Nacional que coincidieron en que David confesó.

Na reanudación del xuiciu suspensu ayeri por una crisis d’ansiedá sufrida pola ma del neñu, la xueza alvirtió a l'acusada sobre la so conducta, que podría suponer la so espulsión de la sala.

La hermana de l’acusada, K.C., que siguió güei cola so declaración como testigu, declaró que la so hermana díxo-y que David F. la maltrataba y tamién que-y pidió les semeyes del fíu, imáxenes qu’al enseñá-yles a la testigu na sala motivaron el lloru de la declarante.

Reiteró l’amor que la so hermana sentía pol so fíu pol que "daba la vida", y caltuvo que Fadila "nun ye una muyer fría", que ye "bona y cariñosa", y que-y escuchó: "Mientres yo tea con vida nun-y va faltar nada al mio fíu"

"David llamábala mora de mierda, y díxo-y 'que te mato'", indicó K.C., que repitió qu’a ella eso nun-y "gustó".

Los dos axentes policiales que detuvieron a los acusaos cuando taben nun parque de Lleón, dempués de recibir una llamada qu’informaba de que dos persones reclamaes xudicialmente queríen entregase, coincidieron en qu’al llegar David F. púnxose de rodiyes, "colocó les manes na nuca, y confesó que fuere él".

"Fui yo, tranquila, yo sé lo que pasa", coincidieron los axentes en rellación a les afirmaciones de David F. nuna escena na que dixeron que-yos sorprendió que Fadila tuviere "relativamente tranquila".

Per parte de so, el dueñu’l taller nel que trabayó l’acusáu definió a David como un "bon" trabayador al que volvió a dar una segunda oportunidá dempués de que robare na empresa, delitu pol qu’hebo una condena con sentencia de conformidá.

"Madre mía, la qu'armé", dixo’l titular del taller sobre la revelación que-y dixo, ensin precisar más, el so emplegáu, que dende esi momentu trabayó "bien" anque taba "mui nerviosu".

La vecina del pisu d’arriba del qu’ocupaben los acusaos, que foi la que fizo la llamada telefónica p’alertar a la policía, relató que sobre les 2 de la madrugada sintió munchos gritos d’una muyer que dicía "nun pueo más, socorru, nun me pegues que me mates", que recordó como "glayíos desgarradores".

Per videoconferencia declaró’l psiquiatra qu’en 2005 trató d’un problema de drogodependencies a David F., al que diagnosticaron un trestornu de personalidá, con rasgos antisociales y dependencia a tóxicos, con poca tolerancia a la frustración con reacciones impulsives.

La capellán de la ilesia evanxelista na cárcel de Villabona relató que contactó cola acusada nel centru penitenciariu onde la atoparon "aterrorizada", con "güeyos de mieu", dixo llorando.

Reveló que llegó a pensar que Fadila podría "quitase la vida", y que la animó a siguir alantre.

Amás, caltuvo que Fadila, que según dixo recibió una carta de David F. na que-y pidía perdón, nun ye una muyer "fría" nin "conflictiva", y que la ve "tristísima, derrotada y esbarrumbada, anque nun ta destruyida".

Otra integrante del equipu de la ilesia evanxelista refirióse a Fadila C. como una moza "destrozada dafechu" a la que-y paecía "perinxusto" que nun pudiera dir a enterrar al so fíu.

Amestó que l’acusada, una moza "tresparente con un alma mui noble", fízo-y saber que sufriere malos tratos de David F., y que’l día de los fechos "saliere a la cai y que lo siguiente que supo ye que’l so fíu taba muertu".