Los primeros paneles solares d'Exiom en Llangréu van salir de fábrica a finales d'añu

La planta de plaques solares de Llangréu va fabricar 500.000 paneles al añu

La planta de fabricación de plaques solares que va acoyer l'antigua factoría de Vesivius en Llangréu va fabricar unes 500.000 plaques solares al añu -500 megavatios-, que suponen la metá de los paneles qu'instala añalmente Iberdrola, impulsora xunto a Exiom de la futura planta, que s'espera qu'arranque la so producción primero que remate l'añu.

Estos datos diolos güei'l conseyeru delegáu d'Exiom, Omar González, y el director d'Iberdrola Anovable, Julio Castro, na presentación del proyectu na Cámara de Comerciu d'Uviéu, yá que la so oficina de captación d'inversiones impulsó la puesta en marcha de la futura planta, que va suponer una inversión de 20 millones y va xenerar, cuando tea a plenu rendimientu, 155 empleos directos, pa los que van tener prioridá d'accesu los ex-trabayadores de Vesivius.

Castro afitó que la instalación de la planta en Llangréu "ye pura transición xusta" pa Iberdrola que, tres el zarru de la central térmica de Lada, incorpórase al proyectu con Exiom como sociu y como futuru veceru d'una factoría "alliniada" cola estratexa de la Comisión Europea d'aprovechar l'efectu tractor de la descarbonización pa impulsar nueves actividaes na XE.