Los sindicatos afirmen que la intransixencia d’Alimerka conduz a la fuelga

Les principales estorbises son la regulación de los descansos y un sistema d'ascensos profesionales

CCOO, UXT y USO achacaron esti vienres a la intransixencia del grupu Alimerka el caltenimientu de la convocatoria de fuelga d'ocho díes convocada nel sector del comerciu minorista d'alimentación a la que tán llamaos dende mañana unos 12.000 trabayadores d'unos 350 supermercaos de la rexón.

Según los sindicatos, Alimerka, mayoritariu na patronal Asupa (Asociación de Supermercaos d'Asturies) que preside y que cunta con unos 6.000 emplegaos en 168 establecimientos, ye'l principal responsable del bloquéu nes negociaciones del nuevu conveniu porque otres empreses sí acepten les condiciones plantegaes polos representantes de los trabayadores y, en dellos casos, yá les apliquen.

Tres dos años de negociación nos que yá hai alcuerdu sobro la xuba salarial -1,8% en 2019, 2% pa 2020 y 2,38% en 2021-, la principal estorbisa ta na regulación de los descansos y nel establecimientu d'un sistema d'ascensos profesionales que dexaría dir medrando los salarios a midida que’l trabayador cunte con mayor antigüedá na empresa.

Según Alimerka, aceptar el planteamientu sindical supondría aumentar el costu salarial nun 24,6% en cuatro años y fadría entrar en perdes a les empreses, un escenariu que nieguen los sindicatos, que recuerden qu’esa empresa ganó 9,5 millones en 2018 y que'l salariu mediu del sector ta en 820 euros con una xornada añal de 1.820 hores de llunes a sábadu.

Piden que compute como tiempu efectivu de trabayu la posa del almuerzu y de la de merienda o reconocer l'antigüedá nel empléu -"daquién qu'entra como mozu d'almacén xubílase como mozu d'almacén y con esa cotización"- nun ye "nada raro", según la representante d'UXT, Marta González, que recordó que'l colectivu afectáu ta "bien per debaxo" de la media del sector servicios nes sos condiciones llaborales.

"Hai trabayadores que tán entrando nes llendes de la probitú", apuntó González en rueda de prensa tres recordar que la xuba salarial apautada supondría una medría de 247 euros añales de media y qu'hai trabayadores a los que les sos empreses tuvieron que poner un complementu p'algamar el Salariu Mínimu Interprofesional dempués de siete años de retrocesos nos socesivos convenios.

"Somos conscientes de la dómina en que convocamos la fuelga. Tol mundu ta de Navidaes, incluyíos los  trabayadores, y sabemos que causa trestornos pero que naide entienda que ye una fuelga irresponsable: nun nos quedó otru remediu", apuntó tres pidir "comprensión" a los ciudadanos.