Los sindicatos alvierten que ta en xuegu'l futuru de Saint-Gobain n'Avilés

Los trabayadores de Sekurit dicen non a les recolocaciones

El secretariu del SOMA FITAG UXT, José Luis Alperi, declaró esti miércoles que los trabayadores de la planta avilesina de Saint-Gobain nun se xueguen namás el pieslle de la división de fabricación de parabrises (Sekurit) onde trabayen 160 persones, sinón el futuru de tol complexu industrial.

“Tamos falando del cese cercanu de l’actividá de Sekurit y d’otru frente a dos o tres años vista porque si nun hai un plan d’inversiones taríemos falando de que nun habrá Saint-Gobain n’Avilés”, declaró Alperi, que faló d’un "momentu crucial” pal futuru de la fábrica.

D’esi mou, tanto les movilizaciones como la protagonizada esti miércoles énte la fábrica como les negociaciones dirán dirixíes a que la salida de la plantiya de Sekurit seya lo menos traumática posible y que la multinacional francesa ponga enriba la mesa un plan d’inversiones que garantice la viabilidá de la fábrica d’Avilés pa los años vinientes.