Los sindicatos de Xusticia amenacen con una fuelga

Acusen al Principáu de llevar a los trabayadores a una situación de discriminación salarial

La plataforma sindical de xusticia formada polos sindicatos CCOO, STAX, USIPA Y UXT amenazaron güei cola convocatoria d’una fuelga indefinida énte la negativa del Principáu d’atender les reivindicaciones del sector y "llevar a los trabayadores a una situación de discriminación salarial".

Nun comunicáu, la plataforma indica la predisposición de los más del personal de xusticia d’Uviéu a secundar una fuelga indefinida tres una encuesta fecha polos sindicatos na que participó’l 82% de la plantiya.

"Dempués de 8 años aguantando al Gobiernu d’Asturies dicinos non a toles nuestres reivindicaciones y dempués de llevar la situación de discriminación salarial, al respeutive del personal de l’autonomía y al personal de xusticia d’otres autonomíes a la situación más estrema argumentando necedaes y mentires y escudándose nes escuses más bizantines, lo fartos que tamos amosaráse en forma de fuelga xeneral", solliña.

Indica que na xunta col conseyeru de Presidencia y Participación, Guillermo Martínez, alvirtieron de qu’esta situación podía llegar.

"Sicasí evitóla, del mesmu mou qu’evitó toles nuestres reivindicaciones, lo que per otra parte nun ye raro, nun siendo tan siquiera conseyeru de xusticia, porque esa responsabilidá política nun esiste n’Asturies, onde nin esiste conseyería, nin tan siquiera viceconseyería de xusticia, circunstancia mui singular y que namái hai na nuestra Comunidá Autónoma", recalca.

Esta situación amuesa, pa los representantes de la plataforma, "l’interés del Gobiernu asturianu por esti serviciu públicu esencial y les condiciones del so personal".

La plataforma afirma que "nada más lloñe" de la so voluntá ta cafiar los intereses de la población asturiana "paralizando un serviciu tan esencial como la xusticia".

"Dende la plataforma sindical intentaremos evitar esta situación, apelando a la negociación de bona fe que ye la única forma d’evitar el conflictu. Conflictu que namái tien un responsable, el Gobiernu asturianu", afirma.

Según el voceru del Gobiernu y conseyeru de Presidencia, Guillermo Martínez, les conversaciones del complementu autonómicu pa los 1.300 trabayadores del sector n’Asturies entamaron va un añu y mediu y "en nada" el Gobiernu convocará a los sindicatos a una nueva xunta "con ánimu d’algamar un alcuerdu".

Martínez, qu’evitó dar cifres del costu que supondría pero que recordó qu’esi gastu nun ta nos presupuestos d’esti añu, insistió en que’l Gobiernu caltién la mesma voluntá nel casu del complementu destináu a los 180 trabayadores de los xulgaos de violencia de xéneru poles circunstancies d’especial dificultá de les sos xeres y qu’esistía hasta 2012.