Los sindicatos llamen a protestar énte'l "caos" que s'avecina nes escueles de 0 a 3

Esixen la integración de tol personal que trabayaba, hasta agora, nestes escueles de titularidá municipal

Los sindicatos UXT, CCOO y CSIF convocaron una concentración pa mañana, miércoles, n’Uviéu pa protestar pola nueva rede d’escueles de 0 a 3 años, pa la que vaticinen "un caos" énte la negativa de la Conseyería d’Educación a atender les sos propuestes sobre la estabilización de la plantiya y l’afitamientu del calter pedagóxicu.

Asina lo apuntaron nuna rueda de prensa na qu’informaron sobre les midíes que piensen adoptar énte’l procesu d’integración de les escueles de 0-3 na Conseyería d’Educación, ente les que s’inxerten nueves concentraciones y fuelga pa los díes 18 y 20 d’esti mes.

Les organizaciones sindicales amosaron la so confianza n’algamar una "bona rempuesta" que suponga la movilización "multitudinaria" en favor de les reivindicaciones del serviciu de la etapa de 0 a 3 por ser un "serviciu necesariu", una "pieza clave" pa "compensar" les desigualdaes ente les families.