Los sindicatos urxen un alcuerdu pa salir de la crisis cola llección aprendida

Llamen a reivindicar con manifestaciones virtuales un empléu más dignu

Los sindicatos UXT y CCOO d'Asturies defendieron esti vienres, por cuenta de la celebración del Primeru de Mayu, la necesidá d'impulsar un alcuerdu que dexe superar la crisis xenerada pola pandemia del nuevu coronavirus y avanzar hacia un nuevu modelu social y económicu "cola llección aprendida".

Los máximos dirixentes de dambes centrales, Javier Fernández Lanero y José Manuel Zapico, respectivamente, espresáronse asina, al traviés d'internet, nes intervenciones que tradicionalmente facíen al rematar la tradicional manifestación del 1 de mayu, suspendida anguaño énte'l confinamientu deriváu del estáu d'alarma.

Según Fernández Lanero, esti inusual Primeru de Mayu, que cumple 130 años de celebración, tien que valir tanto pa reivindicar los derechos de los trabayadores como pa recordar a los finaos pola pandemia y agradecer a tolos emplegaos de servicios esenciales qu'arriesguen la so salú pa protexer la de los demás.

Pal so homólogu de CCOO, anque'l 1 de mayu faise nuna situación d'alarma y de confinamientu pa vencer al virus, "nada nin naide va torgar" que los trabayadores sigan reivindicando "lo que ye de xusticia” porque ensin ellos "nada funciona".