Los ucraínos residentes n'Asturies viven con desasosiegu l'ataque rusu

El Principáu cunta ente la so población con 859 ciudadanos de nacionalidá ucraína

Los residentes ucraínos n'Asturies viven les primeres hores del conflictu nel so país con congoxa.

Les noticies que recibe Anastasia Zhytnyk del so país nun puen ser más tristes. Soníos d'esplosiones, grupos de persones abellugándose n'ilesies, llargues coles nes gasolineres y ensame d'ucraínos abandonando los sos llares, en dellos casos atacándose na frontera polaca pa intentar salir del país. Yera so padre quien dende Ucraína llamaba a les 05:00 p'anuncia-y que la guerra empezara.

La primer consecuencia del conflictu p'Anastasia, ye una familia rota. Ella vive con una de les sos hermanes en Xixón. El destín quixo que so madre y otra hermana, participante en delles ediciones del programa 'Vacaciones en paz', tuvieren de visita.

Los aeropuertos ucraínos tán zarraos, polo que van tener que quedar n'España, nun saben per cuántu tiempu. So padre y otros seis hermanos quedaron n'Ucraína.

P'Alex Vdovenko, otru ucraín afincáu en Xixón, la guerra empezó va munchu tiempu. En 2014, col conflictu nel Donbás, una bomba rusa destruyó toles sos posesiones. Confía en que polo menos una guerra xeneralizada sirva pa espertar al mundu.

A la congoxa qu'estos ucraínos sienten polos sos allegaos, súmase la medrana a que la comunidá internacional abandone a la so suerte al so país.

Asturies cunta ente la so población con 859 ciudadanos de nacionalidá ucraína, un grupu de población que, anque minoritariu ente'l colectivu estranxeru residente nel Principáu, aumentó de manera cimera dende empiezos d'esti sieglu.

Según los datos del Institutu Nacional d'Estadística (INE), de los 859 ucraínos residentes n'Asturies el pasáu añu, 556 son muyeres y 303, homes.