Marcos promete siguir tomando midíes pa meyorar la rentabilidá del campu asturianu

El PP asegura que'l campu ta "hasta'l pescuezu" y Foro acusa al PSOE de "dar la espalda" al mediu rural

El conseyeru de Mediu Rural y Política Agraria, Marcelino Marcos, destacó esti martes les midíes puestes en marcha pol Executivu asturianu pa meyorar la rentabilidá económica de los profesionales del campu. Énte les sos protestes amosó’l so "máximu respetu, independientemente de que fueren sofitaes por unes organizaciones sindicales o otres".

Asina lo aseguró Marcos esti martes nel plenu del parllamentu asturianu, onde respondió a dos entrugues del PP y Foro sobre la situación que vive’l sector agrariu d’Asturies.

"El Principáu nun cuestiona’l malestar del campu. Entiendo qu’hai argumentos pa les movilizaciones", señaló enantes d’alertar de que se tien qu’acertar na "diana" del que tien les competencies en delles materies.