Maroto cree qu'hai una oportunidá pa salvar les dos plantes d'Alcoa

El zarru d'Alcoa va tener impactu en más de la metá de los conceyos d'Asturies

La ministra d'Industria, Comerciu y Turismu, Reyes Maroto, dixo güei que cree qu'hai "una oportunidá" pa salvar les dos plantes n'España del fabricante estadounidense d'aluminiu Alcoa, y aseguró que'l Gobiernu nun va parar de trabayar hasta qu'efectivamente vea "que nun se pue facer nada".

Nun alcuentru en Pekín con corresponsales españoles na so visita oficial a China, Maroto indicó que tán en contactu col conseyeru delegáu de la compañía, Roy Harvey, pa qu'ésti fale colos responsables de la empresa n'España coles mires d'atopar soluciones.

La ministra reconoció que la xunta que caltuvieron representantes de los gobiernos central, gallegu y asturianu cola empresa y los sindicatos "salió mal" al nun aceptar la compañía la reversión del espediente de regulación d'empléu presentáu.

"Somos optimistes, tenemos otres crisis industriales nes que tamos trabayando y esperamos dar bones noticies dientro poco, nun vamos parar de trabayar hasta qu'efectivamente veamos que nun se pue facer nada", dixo.

"Creemos qu'hai una oportunidá pa salvar les dos plantes y neso tamos trabayando", aprofió.

Respecto al costu de la factura eléctrica, unu de los argumentos remanaos por Alcoa pal zarru, Maroto señaló que tán estudiando sacar la puya d'interrumpibilidá, de la qu'Alcoa yera la principal beneficiaría y que taben a puntu de facela pública antes del anunciu fechu pola compañía.

Pola cree que dicir que la industria ta en riesgu resulta alarmista

El conseyeru d'Empléu, Industria y Turismu, Isaac Pola, declaró güei n'Avilés qu'afirmar que la industria nel so conxuntu ta en riesgu, a partir de la decisión d'Alcoa de cerrar dos plantes, paez-y "un poco alarmista".

El conseyeru respondió asina a la medrana espresada polos trabayadores d'Asturiana de Zinc pol preciu de la enerxía eléctrico que, al igual qu'a Alcoa, tamién afecta d'una manera importante al ser industries electrointensives.

Isaac Pola nun considera que la industria asturiana tea en riesgu más allá del problema del costu de la enerxía eléctrico que ta na mesa dende fai enforma tiempu.

A esti respectu, recordó que l'Executivu asturianu treslladó al Gobiernu central la necesidá d'adoptar midíes pa que'l preciu seya competitivu respecto a la redolada europea.

El conseyeru inauguró una xornada de Seguridá vial llaboral, entamada pola Xunión d'Empresarios d'Autoescueles d'Asturies, que se fai nel Centru de Servicios Universitarios d'Avilés.

A entrugues de los periodistes, Isaac Pola declaró que comparte la decisión de los sindicatos de pidir la retirada del espediente d'estinción d'empléu n'Alcoa.

Pola repitió que ta en contactu con tolos axentes intervinientes nel conflictu, tamién col comité européu d'empreses d'Alcoa "y efectivamente aprecióse una aparente irregularidá nel procedimientu de presentación" y, arriendes d'ello, va dase un turnu a la empresa pa que reformule'l so planteamientu.

El conseyeru nun comparte, nin nel fondu nin na forma, la decisión de la empresa y por ello anuncia que se van utilizar tolos medios al algame pa tratar de revertir el planteamientu de l'aluminera.

El zarru d'Alcoa va tener impactu en más de la metá de los conceyos d'Asturies

El zarru d'Alcoa va xenerar una depresión económica que va acarretar la perda de 380 puestos de trabayu en distintos oficios, amás de los 391 que se van desaniciar na metalurxa cola clausura de la factoría.

Son estimaciones del REGIOlab de la Universidá d'Uviéu. Dalgunes d'estes perdes d'empléu van guardar relación directa cola factoría, como los 68 puestos de seguridá y servicios a edificios, o los 41 en tresporte.

Per otru llau, dellos profesionales podríen dir al paru n'árees que nun tienen nada que ver directamente col aluminiu. Son los 27 trabayadores del comerciu, 11 profesionales dedicaos a servicios d'empléu y perdes d'ente cuatro y un emplegaos en munchos sectores como información, servicios financieros, hostelería o actividaes d'arriendu, actividaes postales o arreglu d'ordenadores.

Los conceyos de la redolada de la fábrica van ser los que más noten l'impactu del zarru na so tasa d'empléu. En total 40 conceyos asturianos van sentir en mayor o menor midida'l zarru d'Alcoa.

En númberu d'empleos, los conceyos que más van perder van ser Avilés con 361, siguíos de Xixón y Uviéu con 116 y 104 puestos de trabayu.