Más de 400 efectivos de la Guardia Civil garanticen la seguridá nel Descensu del Seya

Amuesa de les unidaes y medios participantes nel dispositivu

La Guardia Civil movilizó un estensu dispositivu coles mires de garantizar la seguridá na 86ª edición del Descensu Internacional del Seya qu'inclúi 407 efectivos y 159 medios terrestres, acuáticos y aéreos, y toma les villes de Les Arriondes y Ribeseya, el ríu Seya y les sos proximidaes.

Como yá ye tradición, esti vienres, día previu a la prueba, la Guardia Civil amosó na sablera de Santa Marina una amuesa de les unidaes y medios participantes, que vienen tanto del Principáu como de Galicia y Madrid y tán dando serviciu dende'l 31 de xunetu.

Ente los sos cometíos tán garantizar la seguridá de los más de 200.000 asistentes que s'esperen anguaño nel eventu, protexer l'orde públicu, dar auxilios de calter humanitariu, garantizar la seguridá y movilidá de los usuarios de les víes de comunicación, asegurar una primer asistencia en casu d'emerxencia, prevenir, y nel so casu investigar los delitos que se faigan.

Ente los medios emplegaos tán, amás de vehículos touterrén, turismos y motocicletes, embarcaciones y una moto d'agua, medios aéreos como drones y dos helicópteros, que dexen tener una visión en directo tanto del ríu, como de les víes del tren, la carretera N-634 o los campamentos.