Más de la metá de los estudiantes universitarios quier quedar a trabayar n'Asturies

Compromisu Asturies XXI fizo esti barómetru con encuestes a 568 universitarios asturianos

Al 56% de los estudiantes de la Universidá d'Uviéu gustaría-y poder quedar a trabayar n'Asturies a los 12 meses de rematar los sos estudios y dellos, un 40%, considera que va ser posible atopar un empléu na rexón, frente a un 30% que nun ve probabilidaes de llogralo.

Son dalgunos de los datos qu'amuesa la encuesta sobro les mires de los estudiantes asturianos universitarios que fizo l'asociación Compromisu Asturies XXI.

Otru de los datos qu’amuesa ye qu'al 83% d'ellos, de tener que dise, gustaría-yos que fuera con opciones de tornar. Compromisu Asturies XXI fizo esti barómetru con encuestes a 568 universitarios asturianos. L'oxetivu ye faer esti estudiu añu a añu col envís de trazar enclinos y tener un diagnósticu de les mires de los mozos.