Mayor prevención pa evitar accidentes

CCOO ve necesario integrar nes estratexes de prevención de riesgos llaborales a la salú mental

Más d'un centenar de persones participaron esti vienres n'Uviéu na manifestación convocada polos sindicatos UXT y CCOO por mor del Día Internacional de la Seguridá y la Salú nel Trabayu, na que dambes organizaciones naguaron pola medría de medios humanos y recursos económicos en favor d'un empléu con menor siniestralidá con polítiques más ambicioses en favor de la salú.

Sol lema 'Por una redolada de trabayu segura y saludable", dambes organizaciones coincidieron en reivindicar a les alministraciones actuaciones guiaes a algamar oxetivos que dientro del diálogu social contribuyan a atayar esta llaceria.

Nesti sen, apostaron por medrar la dotación de medios al Institutu Asturianu de Prevención de Riesgos Llaborales, la Inspección de Trabayu y la Fiscalía en favor de la llucha escontra la accidentalidá o la mortalidá.