Mañana abre'l Parque Acuáticu de Corvera con un aforu diariu de 519 persones

Los vecinos esperen que l'espaciu seya un reclamu turísticu nel conceyu

Mañana abre’l Parque Acuáticu de Corvera con un aforo diariu de 519 persones y un preciu d’entrada d’ente tres y cinco euros por persona. Esta mañana les asociaciones de vecinos conocieron el resultáu de la tresformación d’un espaciu, qu’esperen seya un reclamu turísticu nel conceyu.

L’agua yá baxa pelos toboganes y sal de los surtidores del Parque Acuáticu de Corvera. El PACO ta preparáu pa la so apertura esti xueves al públicu dempués de cuasi dos años d’obres.

Tendrá aforu pa 519 persones caldía y colocáronse cerca d’un centenar d’hamaques pa los usuarios. Amás cunta con chiringu.

Les entraes podrán comprase dende les 9:00 d’esti xueves na web habilitada y dende les 11:00 nes taquilles del PACO. Los cinco toboganes esperen yá a los primeros bañistes, que caerán a una bañera cola bandera d’Asturies.