Mil trescientos ucraínos pidieron protección n'Asturies y 238 neños y neñes tán escolarizaos

Accem pide a los asturianos que pongan n'alquiler a disposición de refuxaos viviendes que tengan vacíes

Hasta la selmana pasada, cerca de 1.300 ucraínos solicitaren la protección temporal n’Asturies y escolarizáronse a 238 neños y neñes.

Cuasi un millar de los desplazaos yá fueron daos d’alta na tarxeta sanitaria, un 32% d’ellos menores de 14 años.

El principal problema col que s’alcuentren agora ye la falta de vivienda. La ocupación medra en branu n’Asturies y dende Accem faen una llamada a la solidaridá colos diferentes colectivos de refuxaos pidiendo a los asturianos que pongan n’alquiler viviendes que tengan vacíes.

Asturies ufiertó al Ministeriu daqué más de 730 recursos con places disponibles p’acoyer desplazaos d’Ucraína na fase d’emerxencia. Places que, enagora, nun se tuvieron qu’usar.

Los más de los desplazaos tán en pisos, hoteles y hostales baxo la xestión d’Accem y Cruz Roja. Les dos organizaciones yá nun tienen places vacantes.

Los más de los desplazaos ucraínos que viven n’Asturies son families monoparentales. Dalgunes d’elles yá volvieron al so país y otres optaron por viaxar a otros llugares onde la comunidá ucraína ta más afitada.