Monteserín va pidir a Saint-Gobain que construya un centru d'I+D+I pa salvar los puestos de trabayu    

L'alcaldesa d'Avilés propón una xunta al más altu nivel p'abordar la situación na compañía

L'alcaldesa d'Avilés, Mariví Monteserín, propunxo esti vienres una xunta al más altu nivel ente les tres alministraciones públiques pa caltener el volume de trabayu de la fábrica de Saint-Gobain, con soluciones alternatives como la de dar más músculu al centru d'I+D de la multinacional francesa.

La rexidora fixo esi anunciu tres caltener una xunta cola representación sindical de la fábrica, na que s'abordó la esmolición pol zarru de la división de fabricación de parabrises de coches (Sekurit) que trai l'aplicación d'un ERE que se ta negociando pa 125 trabayadores.

Monteserín afitó que Saint-Gobain tien una trayectoria na ciudá de 75 años y, na so opinión, tien posibilidaes de futuru, porque tien munches llinies de producción y, sobre manera nuna contorna que ta adaptada pal desenvolvimientu de la industria.

L'alcaldesa comprometióse a negociar una xunta col Principáu, la Secretaría d'Estáu d'Industria y los conceyos d'Avilés y Castrillón pa esixir a la empresa un proyectu de futuru na contorna, “que pasa por inversiones a curtiu y mediu plazu y pola instalación d'un centru d'I+D que venga del que yá esiste”.

“Creemos que toos xuntos podemos actuar na dirección de convencer a la empresa de que tien muncho futuru na nuesa contorna y que pue, non yá tener l'empléu actual, sinón implementalu y ampliar l'horizonte de los sos productos y el so trabayu”, comentó.