Nacho Azcano, segunda xeneración del Fitomar

Un emblemáticu establecimientu que sigue calteniendo los sos oríxenes

Al alborecer de los primeros pobladores, surde en La Playa la Espasa’l Fitomar. Concebíu como un chiringuitu, ye dende la llegada de los Azcano, a finales de los ochenta, cuando l’establecimientu entama a inxertar a les cañes y aperitivos los primeros platos gastronómicos. Amparo Espiniella entama a cocinar los conocíos tipos d’arroz pa los famientos bañistes, y el so fíu Nacho, entós malapenes un adolescente, yá atiende les meses.

Visitar la sablera de Caravia suel dir acompañáu d’una parada nel Fitomar, unu de los pocos locales asitiaos a pie de sablera nel que se sirven almuerzos, vermús, xintes, meriendes y cenes. Un aspectu que Nacho y la so familia tán reforzando.

Anque la estrella del negociu sigue siendo la comida, con una carta na que l’arroz sigue siendo’l protagonista, col pescáu de la Rula de Llastres.

Anque esti emblemáticu establecimientu de Caravia nun arrenuncia a los sos oríxenes, y munchos usuarios de La Playa la Espasa de xuru que lu recuerden como un chiringuitu. Un llugar nel que refrescase y camudar per unos minutos l’arena pola barra.

La segunda xeneración de los Azcano, dedicada dafechu a la hostelería, porque los otros dos hermanos rexenten tamién restauranes en Colunga y Llastres, garantiza’l presente d’unu de los negocios más conocíos del conceyu. Anque la tercer xeneración yá tien interés pol sector, siguiendo los pasos marcaos por Paco y Amparo nos años ochenta.