Nueva movilización de los trabayadores d'Alcoa

Más de 2.000 persones concéntrense pa pidir la intervención del Estáu

Más de 2.000 persones, según fuentes policiales, concentráronse güei na plaza d'España d'Avilés pa pidir la intervención del Estáu nes fábriques d'Alcoa local y d'A Coruña y, como conseñó l'alcaldesa de la ciudá, Mariví Monteserín, tamién les sanciones que correspuendan.

L'alcaldesa, vistida cola camiseta mariella convertida n'iconu de la llucha pol caltenimientu de les alumineres, pidió seis meses de tiempu a una empresa "que num cumplió nada de lo que taba alcordao nes cláusules de venta y nun pue dexar tirada a esta comarca".

Monteserín, que tomó la palabra sobre un escenariu montáu ante l'Ayuntamientu, foi contundente nel so mensaxe hacia'l Gobiernu d'España: "si la empresa nun da esi tiempu, les fábrques tien que coyeles l'Estáu, de manera temporal, pa desarrollar un proyectu industrial".

Amás, l'alcaldesa faló de la "cerrazón" d'Alcoa y pidió que s'estudien les sanciones y indemnizaciones que correspuendan por nun cumplir nenguna de les cláusules conseñaes nel contratu de compra "cuando los distintos gobiernos d'España cumpliéronles toes".

Una marea mariella, de signu tanto asturianu como gallegu, salió a primer hora de la mañana de la fábrica d'Alcoa, allugada na marxen industrial de la ría, hacia la marxe urbana hasta concentrase na plaza España, onde se cantaron consignes escontra'l cierre de les plantes y escontra un gobiernu que consideren que nun ta faciendo abondo.

La protesta foi col reló de la cuenta atrás en marcha pa los primeros despidos, yá que la empresa pon de fecha tope pa llegar a un alcuerdu pal espediente d'extinción d'empléu de los 686 trabayadores de dambes plantes, el próximu martes, 15 de xineru.

Amás de cantar frases dirixíes al Gobiernu -"Si nun hai solución, Maroto dimisión"- tamién hebo xestos escontra la propia dirección de la empresa, cola quema d'un muñecu que representaba al presidente d'Alcoa n'España, Rubén Bartolomé.

El presidente del comité d'empresa d'Alcoa Avilés, José Manuel Gómez de la Uz, indicó que "tol mundu tenga claro que depués del martes hai un miércoles" y que van siguir na mesma posición de pidir el caltenimientu de la fábrica "entera non a cachos", amás de criticar la "distancia" que tien el Gobiernu nesti conflictu.

El so homólogu n'A Coruña, Juan Carlos López Corbacho, conseñó que la solución agora pasa pol Gobiernu, yá que "Alcoa dixo la so última palabra" y si esto nun llega a buen puertu nagua por que la que ministra d'Industria, Reyes Maroto, "tenga la dignidá de dimitir automáticamente".

El secretariu xeneral d'UXT-FICA d'Asturies, Jenaro Martínez, dixo que "urxe que'l Gobiernu redoble la presión pa buscar una solución garantista al futuru del conxuntu de trabayadores d'Aloa y el Gobiernu nun debe descartar nenguna intervención".

Pela so parte, el secretariu xeneral de CCOO d'Industria, Damian Manzano, esixó al Gobiernu qu'eche tola carne nel asador porque "Alcoa ta riéndose dafechu de tol mundu y toles ferramientes tán enriba de la mesa pa parar los despidos".

El secretariu xeneral de la Federación d'Industria d'USO, Juanjo Estrada, pidió que los políticos d'Asturies y d'España "se llevanten del asientu y faigan una propuesta sólida de soluciones, yá tamos nel descuentu final de los penaltis pero que tengan en cuenta que'l día 15 acaba un partíu y entama otru".

Na protesta tuvieron presentes representantes de tol arcu parlamentariu, tanto nacional como rexonal.

La llucha escontra'l cierre de les alumineres siguirá mañana, domingu, con una marcha peles cais d'A Coruña y el llunes, 14 de xineru, retomaránse les negaciones pal ERE, 24 hores enantes de que posiblemente entamen a aplicase los primeros despidos.