PP, Podemos y Foro piden la dimisión del síndicu mayor

Avelino Viejo asegura que nun piensa dimitir

Los grupos parllamentarios de PP y Podemos na xunta Xeneral avanzaron güei que fadrán usu de los mecanismos al so algame pa promover que la Xunta Xeneral cese al Síndicu Mayor, Avelino Viejo, que refugó dimitir pese a la sentencia del Tribunal Cimeru de Xusticia d’Asturies (TCXA) que cuestiona’l modelu de contratación del organismu.

Asina lo avanzaron na Comisión de Facienda y Sector Públicu de la Xunta Xeneral dempués de conocese va poco la sentencia del TCXA qu’anula la forma de provisión de 25 de los 39 puestos de trabayu colos que cuenta l’organismu al entender que nun se xustificó l’usu del concursu específicu y que refuga l’usu de la llibre designación pa nomar al director de fiscalización.

Na comparecencia, los cabezaleros de PP, Podemos y Foro pidieron la dimisión del Síndicu Mayor, Avelino Viejo, pero esti refugó dexar el so cargu al entender que’l métodu utilizáu foi llegal y que nun fizo una contratación "alloriada".

Sicasí, señaló que "nunca" esti casu ye una razón pa presentar la so renuncia, porque l’aprobación de la rellación de puestos de trabayu (RPT) ye responsabilidá colexada del Conseyu de la Sindicatura y foi aprobada por unanimidá.

"Entendemos que’l concursu específicu ye una modalidá de concursu prevista na llei y que nel nuestru casu taba indicáu", defendió’l Síndicu, qu’insistió en que nun foi una decisión "alloriada, arbitraria y ensin fundamentu".

Sicasí, el cabezaleru del PP na comisión, José Agustín Cuervas-Mons, nun lo vio del mesmu mou y acusó al Síndicu de querer "controlar el sistema de provisión de puestos de trabayu de mou mui personal".

Cuervas-Mons consideró que como presidente, Viejo tien "un plus de responsabilidá" y avanzó que como nun acepta dimitir, el PP esplorará los mecanismos pal so cese que contempla la Llei de la Sindicatura y el reglamentu de la Cámara autonómica p’activalos en casu de tener mayoría abonda.

"Facemos un llamamientu a los demás grupos pa tar a l’altura de les circunstancies", destacó’l cabezaleru de Podemos na comisión, Enrique López, que llamó a buscar la fórmula más afayadiza nel reglamentu de la Xunta o na Llei de la Sindicatura p’algamar un "cese ordenáu" de Viejo dende la Xunta Xeneral.

López, qu’avanzó que Podemos tamién promoverá la so reprobación política na sede parllamentaria, denunció’l "comportamientu irregular de siguío" y indicó que los moos qu’incumplen la llei "nun tienen sitiu n’instituciones como la Sindicatura".

Foro tamién pidió la dimisión d’Avelino Viejo dempués d’acusalu de prevaricación y reprocha-y que nun tuviere en cuenta la opinión de la Mesa de la Cámara sobre’l procesu de contratación.

El cabezaleru d’IX Gaspar Llamazares, nun entró nestos pidimientos, pero censuró l’actuación del Síndicu, reclamó-y una rectificación y tuvo mieu de que "l’alguacil termine alguaciláu".

Dende Ciudadanos, Armando Fernández nun adelantó la postura de Cs sobre’l cese, pero dempués de dicir que la formación naranxa nun prexulga, consideró que la Sindicatura "tien que terminar con estos problemes internos".

Pese a les crítiques de los grupos de la oposición, el Síndicu Mayor defendió’l so mou d’actuar y aseguró que’l concursu específicu "lloñe de ser más floxu" que’l concursu ordinariu ye "más esixente", porque puen "contrastase" los méritos qu’aleguen los candidatos.

Amás, señaló que la llei del Principáu contempla la posibilidá de complementar el concursu con una memoria y una entrevista, daqué que la Sindicatura tuvo en cuenta pa l’asignación de puestos de trabayu "tan específicos" como los de fiscalización.

Dempués de negar que na institución haya 39 trabayadores, sinón 24, el Síndicu afirmó tar razonablemente contentu cola sentencia del TCXA, porque la RPT taba varada dende 2008 y algamóse aprobala por unanimidá.

La sentencia nun se va recurrir, sinón que va asumise "dafechu", señaló’l Síndicu, qu’alvirtió de que si n’otros procesos dalguién aporta un máster falsificáu nun se podrán afitar les pruebes.

Viejo reclamó "respetu" a les competencies y a la independencia de la Sindicatura y insistió en que mientres él tea al frente del organismu defenderá "con enfotu, firmeza" y "ensin desmayu" esta independencia de la Sindicatura que-y atribúi la llei.

La Sindicatura executará la sentencia del TCXA una vez conoza’l recursu del sindicatu CSIF y una vez camudada la RTP podrán facese convocatories públiques, de mou que’l procesu podría tar resueltu "enantes de xunu o’l branu".