PP y Foro aprovechen la presencia de Sánchez pa denunciar los incumplimientos col vial de Xove

El PP va pidir la comparecencia de Puente nel Congresu sobro'l vial

El voceru axuntu del grupu parlamentariu popular nel Congresu, Sergio Sayas, anunció esti llunes en Xixón que'l PP va pidir esta selmana la comparecencia del ministru de Tresportes, Óscar Puente, pa qu'esplique por qué “da la espalda" a Xixón y Asturies col vial de Xove.

Sayas repitió'l "compromisu" del so partíu col Principáu y resaltó que'l PP va rexistrar a lo llargo del día de güei una proposición non de llei en sofitu d'unes infraestructures "vitales" pa la rexón.

El parllamentariu popular acusó a Puente de “rise" de tolos asturianos y pidió-y al presidente del Gobiernu, Pedro Sánchez, que dexe de faer "política de posturéu" y se comprometa col vial de Xove y el restu d'infraestructures pendientes na rexón.

Amás, afitó que n'Asturies quedaron ensin executar 144 millones que taben nos presupuestos de 2022, mientres qu'hebo comunidaes autónomes "que vieron multiplicaes por 5 eses inversiones".

Pela so parte, Foro, cree que Pedro Sánchez perdió la oportunidá de conocer la realidá de la zona oeste de Xixón. Adrián Pumares, diputáu de Foro na Xunta Xeneral, criticó tamién a Adrián Barbón al que s'acusa de conocer dende va meses l'anulación de la llicitación del Vial de Xove.

Un reproche al que se suma l'ausencia del Principáu nel Conseyu Social de Xixón del próximu vienres, onde quier afitase una mesa de trabayu sobro'l vial de Xove.