Pérez Macho y Fernández Bartolomé esixen a Cuesta que dimita como coordinador rexonal de Ciudadanos

Los diputaos creen que ye imprescindible pa la supervivencia de la formación n'Asturies

L’asamblea d’afiliaos que Ciudadanos Asturies celebró ayeri pela nueche n’Uviéu sirvió p’agrandar más la fendidura abierta ente l’actual dirección del partíu y los dos diputaos críticos nel parllamentu asturianu, Armando Fernández Bartolomé y Laura Pérez Macho, qu’esixeron la dimisión del coordinador de Ciudadanos n’Asturies, Ignacio Cuesta.

Los dos diputaos, que yá pidieren a la líder del partíu naranxa, Inés Arrimadas, el nomamientu d’una xestora n’Asturies, fueron a la xunta convocada pola dirección del partíu a pesar de que denunciaren qu’esa "supuesta xunta d’afiliaos" nun ye un órganu que tea reguláu polos estatutos de la formación.

Al acabu del alcuentru, Cuesta fizo públiques unes declaraciones nes qu’aseguraba que la dirección recibiere un sofitu mui claru de los "munchísimos" militantes qu’asistieron a esi alcuentru, qu’esclariaron que’l partíu ta vivu y que tienen ganes de siguir apurriendo a esti proyectu.

Según Cuesta, nel alcuentru munchos asistentes culparon a los dos diputaos críticos d’airear les sos crítiques al traviés de los medios de comunicación en llugar de peles canales internes del partíu al que, con esa actitú, causaron un "gran estrozu".

Sicasí, Pérez Macho y Fernández Bartolomé caltienen que la visión treslladada por Cuesta nun ye de verdá y que cuasi la metá de los intervinientes -non más de 70 asistieron a la xunta, según estos diputaos- pidieron la dimisión del coordinador rexonal.

“Cuesta tien que dimitir yá porque si lo fai, como recueye la prensa y él nunca nun desmiente claramente, pa dir nes llistes d’Alfredo Canteli a finales de 2022 o entamos de 2023, yá nun habrá marxe pa la recomposición de Ciudadanos y eso sedría una traición imperdonable a la militancia y a los votantes”, señalaron los dos diputaos nun comunicáu a comuña.

Nél caltienen que, "con más seguridá entá" dempués d’esti alcuentru, siguen pidiendo a Arrimadas que nome una xestora porque los militantes d’Asturies nun se merecen una xunta directiva "que s’apoderó de los mandos del partíu pa guialu al so inxerimientu nel PP colos plazos y los métodos afayadizos pa caún y pa les sos carreres personales".