Primer día pa presentar les solicitúes d'almisión d'alumnáu pal cursu viniente

Nueva convocatoria de los sindicatos docentes pa pidir que se reduza la xornada a 23 hores selmanales

Primer día pa presentar les solicitúes d’almisión d’alumnáu pal cursu viniente. El plazu rematará’l 7 de mayu viniente y ta abiertu pa toles etapes non universitaries, inxertes les nueves escueles de 0 a 3 años del Principáu.

Nesti casu, la conseyera d’Educación esplicó que naquellos conceyos onde haya escuelines municipales y autonómiques, les families tendrán que solicitar la plaza nes dos redes, ye dicir, por duplicáu.

Nuna visita a Siero, Espina confirmó l’inxerimientu del conceyu al proyectu del Principáu. Abriránse dos nueves escueles qu’ufiertarán 70 places.

Nueva convocatoria de los sindicatos docentes pa pidir que se reduza la xornada a 23 hores selmanales

Comisiones Obreres, Suatea, UXT y CSIF manifestaránse’l sábadu viniente n’Uviéu. Los sindicatos de la enseñanza volverán a esixir meyores llaborales pa los 12.000 docentes qu’hai n’Asturies. Denuncien falta de diálogu y compromisu de la Conseyería.

Amás, critiquen que se siga subvencionando con dineru público la enseñanza privada al traviés de los conciertos educativos. Insisten en rebaxar la xornada llectiva de los maestros a 23 hores selmanales y piden aliviar la carga de los mayores de 55 años.

ANPE, qu’esta vegada desmárcase de la convocatoria, diz que ta politizada.