Primer propuesta pa instalar eólico marino n'Asturies

Los parques taríen a 29 kilómetros de la mariña de Navia y Tapia y xuntos tendríen 61 aeroxeneradores

Primer propuesta d'una empresa pa instalar dos parques eólicos marinos n'Asturies. Taríen a 29 kilómetros de la mariña de Navia y Tapia. Sumaos van tener 61 aeroxeneradores, una estensión de 185 kilómetros cuadraos y una potencia de 915 megavatios. La compañía Abey Energy presentó la documentación pa entamar el procedimientu d'evaluación impacto medioambiental.

El Poniente I tendría una potencia de 435 megavatios pola instalación de 29 turbines eóliques y un área d'ocupación de 80 kilómetros cuadraos. Taría a 29 kilómetros de la mariña de Navia y Valdés, na zona d'usu prioritariu pa la enerxía eólico -NOR 7- afitada nos POEM del pasáu 28 de febreru.

El Poniente II taría na NOR 6 y sedría mayor. Con 32 aeroxeneradores y una potencia de 480 megavatios ocuparía una estensión de 105 kilómetros cuadraos. El so allugamientu, a unos 29 kilómetros de la mariña de Tapia. Llama l'atención que les llinies eléctriques submarines proyectaes vayan pela mariña asturiana y evacuen en Lugo.

Dambos polígonos sumaríen 61 aeroxeneradores de 15 megavatios caunu. La so estructura, columnes d'aceru xuníes por aciu de brazos o pontones. Estes diríen sobre plataformes flotantes por cuenta de la fondura del llechu marín, ente los 100 y los 200 metros. El so altor, dende la superficie del mar hasta l'estremu de les pales, va ser de 300 metros

Los dos proyectos presentaos pola empresa madrilana Abei Energy y encargaos a la consultora canaria Elittoral, afiten alternatives pa los distintos elementos de los parques en función, recoyeron criterios técnicos, medioambientales y socioeconómicos nel mediu marín.

Los dos proyectos incluyen l'efectu nel paisaxe de los parques. Señala’l faru de San Agustín, playa de Frexulfe y Reserva de Barayu nel casu del Poniente I. A Punta del Pedrón y de nuevo Frexulfe y el faru de San Agustín nel casu del Poniente II.

Un proyectu que tien la oposición de los alcaldes de los conceyos afectaos si ello trai, alvierten, consecuencies pa sectores como'l de la pesca.