Primer xornada de fuelga nos supermercaos asturianos

Nel centru loxísticu d’Alimerka en Llanera un piquete torga l'accesu de camiones que lleven y distribuyen mercancía

La fuelga nel sector del comerciu minorista d'alimentación nun torgó l'apertura de la mayor parte de los supermercaos d'Asturies anque, según los sindicatos, munchos d'ellos sí que se tán viendo afectaos pola falta de personal y de veceros.

La primera de les ocho xornaes de fuelga convocaes na mayor parte de les cadenes de supermercaos -Mercadona y El Corte Inglés tienen conveniu propiu- ta desenvolviéndose ensin incidentes, según les mesmes fontes, que calificaron esta primer xornada de paru de "positiva".

La falta de personal en dellos establecimientos provocó que namás haya una caxa de cobru abierta o que se tuvieren que cerrar les secciones de frutería, carnicería, panadería o pescadería.

Dende primer hora, piquetes informativos tán percorriendo los supermercaos d'Uviéu, Xixón y Avilés, ente otros llugares, pa tratar de forzar el zarru d'establecimientos y informar a la vecería de la protesta que lleven alantre y a la que tán convocaos unos 12.000 emplegaos de 350 supermercaos.