Prisión provisional, comunicada y ensin fianza pa unu de los prindaos pola muerte de David Carragal

Los otros dos mozos en llibertá con cargos por omisión del deber de socorru

La titular del Xulgáu d’Instrucción númberu 4 d’Uviéu ordenó l’ingresu en prisión provisional, comunicada y ensin fianza pa unu de los tres mozos prindaos pola mortal agresión a David Carragal, de 33 años, nes fiestes del barriu uvieín de La Florida’l pasáu 11 de xunu.

Ye Jorge Cué, de 18 años y vecín de Llanes, qu’almitió énte la maxistrada que llanzó una patada a la víctima anque ensin poder precisar si lu alcanzare o en qué parte del cuerpu-y dio.

Los otros dos mozos prindaos, de 18 y 19 años, collacios del presuntu autor de la mortal agresión que lu acompañaben aquella madrugada, quedaron en llibertá con cargos por omisión del deber de socorru.

La xuez decidió unviar al Centru Penitenciariu d’Asturies a Jorge Cué al que de mano imputa un delitu d’homicidiu dolosu, como midida provisional énte "la gravedá de les consecuencies finales de los fechos", según detalló’l Tribunal Cimeru de Xusticia d’Asturies.

Los dos collacios, a los qu’enagora nun se-yos considera participantes directos na agresión, siguirán venceyaos a les dilixencies con obligación de tar a disposición del xulgáu por si ficiere falta una nueva declaración o cualquier otra dilixencia, asina como’l deber de comunicar cambéu de casa o cualesquier otra circunstancia que pudiere torgar la so localización.

La maxistrada tomó la decisión según el criteriu de la Fiscalía dempués de tomar declaración a los tres mozos delles hores.

Tal y como ficiere ayeri énte los axentes policiales, Jorge Cué reconoció énte la maxistrada que llanzó una patada a David Carragal, pero insistió en que nin siquiera recuerda bien si llegó a da-y, mientres que los collacios negaron la so participación en nengún tipu d’agresión.

Los tres mozos yá dixeron ayeri énte la Policía Nacional que la víctima los increpó por mirar a una de les dos muyeres que lu acompañaben nes fiestes y foi entós cuando unu d’ellos fizo’l xestu de da-yu na patada ensin saber siquiera si llegó a da-y porque salieron corriendo del llugar.