Prisión provisional pa los deteníos pol asesinatu de Javier Ardines

Unu de los deteníos, el ciudadanu arxelín, confesó'l crime

La xueza decretó prisión provisional pa los tres deteníos en Vizcaya pol asesinatu del conceyal de Llanes Javier Ardines: Pedro L.N.A, presuntu inductor del crime, D.B., unu de los dos supuestos autores materiales, y J.M.B, que según los investigadores pudo ser l'enllaz colos sicarios.

La titular del Xulgáu de primer Instancia y Instrucción de Llanes emitió la nueche d'esti xueves un autu nel qu'atribúi a los tres arrestaos un delitu d'asesinatu pol crime cometíu'l pasáu 16 d'agostu na parroquia llanisca de Belmonte de Pría y únvialos a la cárcel d'Asturies de manera provisional, comunicada y ensin fianza.

Fontes xudiciales informaron de qu'unu de los dos arxelinos presuntos autores materiales del crime -el segundu ta en Suiza pendiente d'estradición- amplió la so versión dada énte la Guardia Civil pa reconocer, nuna declaración de cuasi dos hores, "la so participación activa tanto na preparación como na execución de lo encargao".

Sicasí, el presuntu inductor, nuna declaración de namás seis minutos na que refugó responder a entrugues, nun reconoció nin l'encargu nin la participación nel crime del que fuera'l so amigu, mientres que l'arrestáu como posible enllaz colos sicarios negóse a declarar.

El titular del xulgáu decidió tamién llevantar el secretu de sumariu sobre la investigación d'esti crime, que, según los investigadores, Pedro Nieva encargó a dos sicarios non profesionales de nacionalidá arxelina y procedentes del mundu de la droga cola collaboración d'un amigu, movíu polos celos derivaos de la so obsesión por una supuesta rellación d'Ardines cola so muyer.

La xueza tomó declaración a estos tres deteníos, que fueron prindaos na madrugada del pasáu martes, dempués de que la Guardia Civil rastrexara'l miércoles, en busca de más pruebes, la vivienda vacacional que'l presuntu autor intelectual tien na parroquia de Belmonte de Pría, asitiada cabo la del edil y de la zona na que se cometió'l crime'l pasáu 16 d'agostu.