Prisión provisional pal presuntu sicariu d’Ardines

Maamar Kelii negó la so presencia nel día y llugar de los fechos

La maxistrada titular del Xulgáu de Primer Instancia y Instrucción de Llanes dictó una orde de prisión provisional comunicada y ensin fianza pal ciudadanu arxelín K.M., de 42 años, investigáu como unu de los dos presuntos autores de la muerte del conceyal d’IX en Llanes, Javier Ardines, y al que-y imputa un delitu d‘asesinatu.

La xueza tomó la decisión acordies col criteriu de la Fiscalía, que vía riesgu de fuga.

M.K., qu’ayeri foi entregáu a España poles autoridaes suices tres cumplir una condena por otros delitos y esta mañana pasó a disposición xudicial, únicamente quixo contestar a les preguntes del so abogáu

Na so declaración negó la so presencia nel día y llugar de los fechos, el 16 d’abril de 2018 en Llanes, y polo tanto, tamién participar na muerte violenta del conceyal llaniscu, informó’l Tribunal Cimeru de Xusticia d’Asturies.