Pulgar apunta al ex-asesor fiscal del Montepío como una persona clave na trama

Insistió en que'l poder de Villa yera máximu

Según el presidente d'anguaño del Montepío, la empresa de José Manuel Fernández, Aucontor, yera una pieza clave na xestión de la entidá. Encargábase hasta de les nómines y los contratos blindaos. Un trabayu d'asesoramientu pol que cobraba al añu 100.000 euros.

Na so declaración xudicial, Pulgar señala al ex-asesor como l'ideólogu de l'axudicación del xeriátricu a Alcedo de los Caballeros. A xuiciu del presidente d'anguaño del Montepío esistía un alcuerdu previu ente Postigo, José Manuel Fernández y el constructor pa preparar a la carta l'adxudicación de la residencia de Felechosa.

Nesti plan, el papel de Villa sedría'l de consiguidor, la persona que s'encargaba en Madrid de llimar el tarrén p'algamar la subvención.

Na so declaración xudicial, Pulgar insistió en que'l poder de Villa yera máximu. La so palabra, recalcó, llegaba hasta'l suétanu y naide s'atrevía a contradicir les sos órdenes.

Los fiscales Anticorrupción interesáronse sobre manera en saber si dalgún responsable políticu pudo tener contraprestaciones por dar facilidaes al proyectu.

Pulgar, aseguró que nun tien constancia. Les pesquises d'Anticorrupción van pal Institutu de reestructuración de les comarques mineres, pa l'alcaldía d'Ayer y tamién entrugaron pola conseyería d'industria del Principáu.

El Montepío fadrá una auditoría de les últimas obres feches en Ledesma pa ver si hebo irregularidaes
El presidente del Montepío tamién confirmó que fadrán una auditoría de les últimes obres feches nel balneariu de Ledesma, en Salamanca, obres que costaron seis millones d'euros y terminaron en xunu de 2013.

Pulgar recordó que dientro d'elles axudicáronse obres por valir de 2,9 millones a la constructora Alcedo de los Caballeros, cantidá que xubió finalmente hasta cuasi cuatro millones. Pulgar denuncia qu'esa medría nun foi sometida a l'autorización de la Comisión Rexonal del Montepío, presidida entós por Postigo.

Amás, ta convencíu de qu'hebo intencionalidá nesti asuntu porque la Comisión Rexonal aprobó'l pidimientu d'un creitu de 3,5 millones na mesma xunta na que s'axudicaron les obres a Alcedo por 2,9 millones. Pulgar asegura qu'eses obres nun yeren imprescindibles y entovía asina se llevaron alantre. El Montepío estudiará si lleva alantre reclamaciones escontra la constructora en función del resultáu de l'auditoría.