Querella escontra'l psicólogu forense de los xulgaos d'Uviéu

Primer querella d'odiu por razón de xéneru que se presenta n'España tres la reforma del Códigu Penal

L'Asociación asturiana Abogadas para la Igualdad y la organización internacional Women's Link acaben de presentar una querella escontra'l psicólogu forense de los xulgaos d'Uviéu, por un delitu d'odiu escontra les muyeres.

Lleven años escuchando les quexes de decenes de muyeres polos informes del psicólogu forense de los xulgaos d'Uviéu, sobro los sos prexuicios escontra les víctimes de violencia de xéneru o d'abusos a los sos fíos. Por ello les asociaciones Abogadas para la Igualdad y la organización internacional Women's Link decidieron presentar una querella por un delitu d'odiu en base al xéneru, nesti casu escontra les muyeres.

Denuncien qu'esti profesional, qu'amás ye'l presidente del Colexu de Psicólogos d'Asturies, desacreita nos sos informes el testimoniu de les víctimes basándose en prexuicios como que les muyeres manipulen a los menores pa denunciar y mancar a les ex-pareyes.

La querella inclúi cinco casos de muyeres y menores asturianos víctimes d'abusos, dos del padre y unu del güelu qu'aseguren nun llograron xusticia, porque los informes d'esti psicólogu calificaron a les madres de mentiroses y manipuladores. Les denunciantes creen que pue haber munchos más casos na rexón, que por cuenta de estos informes, quedaron impunes.

Ye la primer querella d'odiu por razón de xéneru que se presenta n'España tres la reforma del Códigu Penal.

El Gobiernu, a la espera de conocer detalles sobro la denuncia

El voceru del Gobiernu asturianu, Guillermo Martínez, aseguró güei que l'Executivu autonómicu ta a la espera de conocer los detalles de la querella que Women's Link Worldwide y Abogadas para la Igualdad presentaron énte'l decanatu de los xulgaos d'Uviéu escontra un psicólogu forense.

Según Martínez, dende'l Gobiernu caltienen el máximu respetu polos procesos y decisiones xudiciales y una actitú de máxima collaboración, tamién nesti casu.