Ramón Argüelles abandona la dirección d’IX

"Nun ye un pasu p’atrás, sinón una oportunidá pa que’l que me sustituya algame lo que nun pudi"

El coordinador xeneral d’IX d’Asturies, Ramón Argüelles, decidió abandonar el cargu dempués de la derrota que sufrió nes primaries de la selmana pasada pa escoyer al so cabeza de llista pa les elecciones autonómiques del 26 de mayu.

La eurodiputada Ángela Vallina ganó al algamar el sofitu de cuasi la metá de los participantes na votación, frente al 39 por cientu de sofitos qu’algamó Argüelles y el 12 por cientu de la tercer candidata, Carmen Conde.

Dempués d’estos resultaos, Argüelles dio anuncia de qu’abría un periodu de reflexón personal qu’esti martes materializó cola so dimisión al frente de l’alianza, qu’ocupaba dende 2016.

"Al nun algamar la unanimidá pa la llista nin ser la candidatura ganadora decidí renunciar al mio cargu de coordinador y asina-y lo comuniqué a Alberto Garzón. Nun ye un pasu p’atrás, sinón una oportunidá pa que’l que me sustituya algame lo que yo nun pudi", señaló nuna rueda de prensa na que tuvo acompañáu por dalgunos de los miembros de la so llista.