Ramón Iglesias, hestoria viva del comerciu uvieín y del barriu de Santo Domingo

'Perfumerías Mestallón' cumple mediu sieglu

Enantes de tener el so propiu negociu de droguería y perfumería nel barriu de Santo Domingo, l'uvieín Ramón Iglesias yá conocía abondo’l sector comercial tres trabayar pa unos grandes almacenes de la ciudá.

La oportunidá llegó-y, sicasí, mientres rexentaba cola so esposa'l chigre que-y dexaren sos padres en Ciudá Naranco.

Foi fai xusto 50 años cuando entamó 'Perfumerías Mestallón', una aventura que, pa daquién nacíu na otra punta de la ciudá, supunxo un enorme cambéu.

Los empiezos nun fueron fáciles. Costó arrancar el negociu nuna zona con pocos residentes. Ramón foi testigu de la gran medría qu'esperimentó'l barriu nes décades siguientes.

Con ello vino tamién la medría del negociu. Anguaño, el más antiguu de los que queden abiertos pela zona.

Desque se xubiló, ye la so fía Raquel la que lleva les riendes del establecimientu. Ramón ocupa'l so tiempu nun pequeñu güertu en San Isteba​, anque nun falta a la so cita cada día nel local, p'apurrir ánimos, conseyos y esperiencia.

Ramón ye hestoria viva del comerciu uvieín y del barriu de Santo Domingo.​