Ramonín 'el del Siglo' inventó'l primer palu selfie artesanal

El llaniscu lleva tres décades usando una vara p'autofotos

Nunca lo llegó a patentar, pero esti llaniscu de nacencia pudo llegar a convertise nel inventor del palu de selfie. Ramonín 'el del Siglo' lleva tres décades usando una vara que lu dexa enfocar a una distancia más allá de les llendes normales del brazu.

El so primera selfie foi una imaxe d'altor. Foi en 1991, 14 años enantes qu'un canadiense patentara esti instrumentu d'autofotos.

La so afición pola fotografía compaxinóla cola so vida profesional. Sos padres rexentaron una xuguetería dende 1933, 'la del Siglo'. Ramonín deprendió les claves d'esti negociu cuando namás yera un neñu y, amás, dio-y un plus poniendo a la venta les postales turístiques, qu'él mesmu fotografiaba.

L'amor pola so tierra y pola so xente tamién lu llevó a inmortalizar, principalmente, les fiestes de la villa llanisca cola so famosa piértiga que llegó a midir, confiésanos, hasta siete metros d'altor.

La ilusión por inmortalizar esti conceyu a vista de páxaru tamién lu llevó a percorrer la sierra del Cuera. La so mayor proeza foi facer d'una tirada los 30 kilómetros del Cuera, pasando per toles sos cumes, la más alta, la del Turbina, a más de 1.300 metros d'altitú.

A los sos 78 años d'edá, Ramonín, yá xubiláu, sigue soportando'l pesu del so palu de selfie, y guardando imáxenes y alcordances del so paraísu llaniscu.