Recoyida d'ayuda pa Ucraína

Son delles les iniciatives que surden nel Principáu pa unviar comida y melicines a los refuxaos

Asturies ta volcándose cola población ucraína y yá se punxeron en marcha delles iniciatives pa unviar comida y melicines a los refuxaos.

En malapenes 24 hores dende qu’entamaron el llamamientu, Krystina Pechena y los voluntarios que trabayen con ella algamaron xuntar mediu camión d’ayuda humanitaria n’Asturies, que viaxa yá pa ser repartíu. Ella llegó con sos padres al Principáu siendo una neña, pero n’Ucraína tien familia y amigos.

Creó la páxina en facebook 'Ayuda Humanitaria para Ucrania desde Asturias' (@AyudaUcraniadesdeAsturias) onde apaecen los puntos de recoyida. Enagora, tiénenlos n’Uviéu, Xixón, Cualloto y Llugones, y darréu n’Avilés.

En Cracovia, en Polonia, Covadonga Solares, una xixonesa que estudia ellí un máster, recaldó xunto a los sos compañeros más de 30.000 euros. Donaciones coles que tán comprando comida, melicines y inclusive xeneradores eléctricos pa unviar a Leópolis, ciudá vecina n’Ucraína, onde tán diendo munchos refuxaos.

El so enfotu por ayudar va más allá y alcontró una collaboradora, otra asturiana, Nerea Prado, cola que foi al institutu y que ta d’Erasmus n’Italia. Gracies a la madre d’esta, que vive n’Asturies, punxeron en marcha abondos puntos de recoyida d’ayuda. Colexos, tiendes y comercios de Xixón, Uviéu, Sotrondio, Mieres, Tinéu o Siero son dalgunos d’ellos.