Reivindicativa celebración de la Virxe del Carbayu en Llangréu

La pregonera Amparo Antuña y les autoridaes dedicaron unes palabres de sofitu a los trabayadores de Vesuvius

Les fiestes n'honor a la virxe del Carbayu, en Llangréu, celebren güei’l so día grande.

Una romería qu'entamaba a media mañana y na que, amás d'arguyu mineru y llangreanu, viviéronse momentos reivindicativos.

La pregonera Amparo Antuña y les autoridaes dedicaron unes palabres de sofitu a los trabayadores de Vesuvius.

Quieren, dicen, que los 111 emplegaos de la planta de Ciañu puean celebrar bien llueu'l fin de la so llucha escontra'l desempléu.

Tolo demás foi fiesta y música na Capiella del Carbayu.

El día grande de les fiestes de Nuestra Señora del Carbayu celebróse en Llangréu ente bailles rexonales, música de gaites y ufierta del ramu. Declarada d'interés turísticu rexonal nun hai tradición que nun se cumpla nesta romería, qu'axunta a llangreanos y convidaos.

La imaxe de la virxe del Carbayu va güei a costazos de cuatro ex-brigadistes de Salvamentu Mineru y, anque tradicionalmente sal de la ermita a escures, allumada por veles, anguaño allumáronla los cascos de los brigadistes.