Requexos del conceyu d'Eilao​

Cuenta con una de les reserves de rebollos más importantes d'Asturies

Nel corazón de Tamagordas, nel conceyu d'Eilao, asítiase'l que se considera'l rebollal más importante d'Asturies.

Un monte que suma ente les 500 y 1.000 'sufreiras', como se-yos llama na zona. La calidá del so corchu, unu de los más apreciaos per sieglos, favoreció'l so caltenimientu hasta dibuxar esti espectacular paisaxe.

Al otru llau del ríu Navia ta Folgueiróu. La so singular piscina, asemeyando una terma romana, ye la xoya de la corona d'un área recreativa con chigre-restaurán y área d'autocaravanes. Cuasi acabante algamar la so mayoría d'edá, Folgueiróu suma cada añu más visitantes.

Non mui lloñe, n'Eilao, capital del conceyu, tán los restos de 'A Casa das Cebolas'. Ye un n'edificiu más que centenariu enllenu de simbolismu. Ye l'antigua fonda del pueblu, a la que bien  llueu se-y anovará la so cubierta y van reforzáse-y los murios.

Lladera abaxo pervive la ponte colgante d'Eilao. La so construcción, d'hacia 1934, dio vida a los pueblos de la parte este del conceyu a los que'l banzáu de Doiras, del que ye coetaneu, dexó prácticamente aisllaos. Anque seya a pie, la ponte fai que nun dean un rodéu de decenes de kilómetros pa llegar a la capital.

Acabamos en Santesteba, morada d'aves hasta va mediu sieglu. Bien d'Interés Cultural, destaca polos sos voladizos o pola estrechura de les sos caleyes y merez ser el final d'un camín, que nun dexa de sorprender a quien lu percuerre.