Rexistru de la casa de Pedro Nieva en Belmonte de Pría

Nieva llegaba y salía de la vivienda cudiáu por axentes de la Guardia Civil

La Guardia Civil remató'l rexistru de la vivienda que'l deteníu como presuntu inductor del asesinatu del conceyal de Llanes Javier Ardines tien na parroquia llanisca de Belmonte de Pría, mui cerca de la que yera la residencia del edil y de la zona onde se cometió'l crime'l pasáu 16 d'agostu.

En compañía del arrestáu, Pedro Nieva, los axentes de la Unidá Central Operativa (UCO) de la Guardia Civil rexistraron les distintes estancies de la vivienda, incluyíes la cochera y l'antoxana, cuasi dos hores, y salieron de la casa unifamiliar de dos plantes enantes de les 11:00 con delles caxes.

Al salir de la vivienda cudiáu por dellos axentes, el deteníu, vistíu con un plumes con una capucha que guardaba parcialmente la so cara, refugó responder a les entrugues de los numberosos periodistes que siguíen el rexistru.

Darréu'l deteníu foi treslladáu al cuartel de la Guardia Civil de Llanes onde los axentes siguen colos llabores d'investigación, percanciando pruebes y analizando fondamente ente otres coses, los coches que-yos fueron interveníos a dos de los prindaos, ente ellos los de Pedro Nieva.

Na inspección participen perros especializaos pa inspeccionar a fondu esos vehículos. La Guardia Civil nun entrugó entá a Pedro Nieva y nun tien previsto facelo hasta la xornada de mañana.

La Guardia Civil prindó a primer hora d'ayeri na so casa d'Amorebieta a Nieva como presuntu autor intelectual del crime cometíu'l pasáu 16 d'agostu en Belmonte de Pría, a perpocos metros de la vivienda d'Ardines nesti conceyu de la mariña oriental asturiana.

Los investigadores consideren que l'arrestáu encargó'l crime a dos sicarios non profesionales movíu polos celos y cola collaboración d'un cuartu prindáu.

Los otros dos deteníos pol crime de Javier Ardines tán nos cuartones de los cuarteles de Llangréu y Xixón, a la espera de pasar a disposición xudicial, quiciabes mañana. La Guardia Civil distribuyólos per dellos cuarteles pa evitar que los tres prindaos coincidieren en Llanes, onde podríen comunicase ente sí pola distribución de los cuartones.

En Llangréu ta deteníu l'otru español que, xunto a Pedro Nieva, foi deteníu pol asesinatu d'Ardines. Hasta agora vivía nel País Vascu y nun tenía rellación dalguna con Asturies.

En Xixón ta unu de los arxelinos contrataos p'atacar al conceyal. Sigue pendiente de ser estraditáu a España l'arxelín que ta presu en Suiza cumpliendo una pena por tráficu de droga.