Robláu’l decretu que prórroga les cuentes de 2017

L’Executivu pidirá polo menos 90 millones a la Xunta pa complementar la prórroga

El Gobiernu rexonal pidirá polo menos 90 millones d’euros en creitos estraordinarios a la Xunta Xeneral pa complementar la cuantía de la prórroga que deberá aplicar en 2018 por mor del refugu de los sos presupuestos.

Esta estimación fízola güei la conseyera de Facienda, Dolores Carcedo, dempués de la xunta del Conseyu de Gobiernu qu’aprobó’l decretu de prórroga, un documentu técnicu y ensin cifres que busca llendar los efectos de la falta de presupuestos.

El refugu na Xunta Xeneral del proyectu presupuestariu, que s’elevaba a 4.485 millones d’euros, amenorgará la disponibilidá de fondos pa l’alministración autonómica nun mínimu de 267 millones d’euros al tener qu’aplicar una prórroga "que siempre significa menos y más tarde y que nun quería nin el Gobiernu nin los más de los asturianos", solliñó Carcedo.

La conseyera insistió en que’l Gobiernu dirá zarrando nel mes de xineru les cifres definitives una vez conocida la liquidación de 2017 y les previsiones d’ingresos en cuestiones como’l sistema de financiación autonómica y dempués fadrá les lleis de creitu que prevé tramitar na Xunta pa finales de febreru o en marzu.

Crítiques a la prórroga presupuestaria

Na oposición, critiquen la prórroga presupuestaria por incumplir la llei según manifiesten y les recomendaciones de la Sindicatura de Cuentes.

El diputáu del Partido Popular, Agustín Cuervas Mons, esixó esta mañana que l’executivu rexonal rectifique.

Podemos tamién se refirió al informe de la Sindicatura de Cuentes y considera que nun pue ser qu’un gobiernu nun xustifique factures por valir de 104 millones d’euros.

Podemos considera que l’Executivu acuéyese a la prórroga pa xustificar disfunciones na xestión.