Sal a información pública'l proyectu del Grupu Arcichamotas pa buscar oru en Miranda

La Coordinadora Ecoloxista opónse al proyectu

La Coordinadora Ecoloxista d'Asturies refugó'l nuevu proyectu promovíu pol Grupu Arcichamotas pa la busca d'oru nel conceyu de Miranda, qu'esti llunes salió a información pública nel Boletín Oficial del Principáu.

Nun comunicáu, el colectivu conservacionista esplicó que la promotora ye la mesma firma qu'esplota delles mines nesta zona, onde agora “quier empecipiar investigaciones en busca d'oru explotable".

"La empresa quier buscar más oru na mesma franxa onde yá buscaron otres munches nes últimes décades, cosiendo Asturies a furacos de sondeos, sobre los que'l Principáu nun tien nengún control y viose'l peligru que supón", alvirtió la Coordinadora.