Santianes gana población gracies a la so situación y bones comunicaciones

La capital del prerrománicu asturianu presume d'ilesia, dedicada a San Xuan Evanxelista

Na nuesa sección 'Vida nel pueblu' de güei vamos hasta'l conceyu de Pravia. Santianes presume de ser la capital del prerrománicu asturianu. La que foi segunda capital del Reinu d'Asturies sol reináu del Rei Silu ye anguaño un pueblu capaz de ganar población gracies a la so situación y les sos bones comunicaciones.

Santianes ta bañáu pol ríu Nalón a dos kilómetros de la capital del conceyu. Un pueblu llaberínticu formáu por 11 barrios tremaos a partir de la xoya de la corona, la ilesia de San Xuan Evanxelista, del sieglu VIII.

Equí viven a diario unos 170 vecinos y una trentena más tien la so segunda residencia.

Con una asociación de muyeres y otra de festexos Santianes ye, dicen, un exemplu de bona vecindá y tranquilidá. Quiciabes por ello, y poles sos bones comunicaciones, nun dexa de ganar población.

Esti pueblu fiesteru cunta con dos celebraciones al añu: n'honor a San Isidro, en mayu; y al Cristu de Santianes, en setiembre. Y si daqué echen de menos ye, señalen, la reapertura de la escuela.

Munchos optaron por desenvolver equí la so vida llaboral. Cuenta con tres plantíos de quivis, un obrador de pasteles, un taller de forxa y profesionales lliberales, como diseñadores gráficos.

Un pueblu milenariu que vive'l presente enllenu d'ilusión.