Santolaya, n'Amieva, un pueblu de namás un habitante

De pie siguen tres horros y una casona na que vivió Manuela Blanco, pupila de Xovellanos

Nunca hebo munchos vecinos en Santolaya. Esta aldega d'Amieva siempres foi de mui poques cases. De toes, namás una, ta habitada. Nella vive Manuel Blanco, “Lulu”. A los sos casi 72 años confiesa que la soledá, pa él, nun ye problema dalgunu. Sicasí tampoco-y importaría cuntar con dalgún qu'otru vecín.

Allugada a 500 metros d'altitú Santolaya pertenez a la parroquia de Sebarga. Nunca tuvo nin capiya nin escuela. Quien de neñu creció nesti llugar, tenía que caminar cuasi dos kilómetros hasta'l pueblu más próximu pa dir a escuela.

Igual si va unos años nun decidiera tornar, Santolaya taría yá deshabitada dafechu. Y ye que per un tiempu, el so únicu habitante, vivió y trabayó bien lloñe de la so aldega natal. La xubilación llegó tres munchos años de trabayu nel campu y al ganáu.

Malapenes ocho construcciones siguen de pie en Santolaya, dalgunes son cuadres que fueron viviendes. El so patrimoniu etnográficu ta representáu por tres horros, dalgunu d'ellos con dibuxos y toos de propiedá compartida. Al nun haber veceros, a Santolaya yá nun van los vendedores ambulantes, y nin siquier xuben el pan.

A la casona de Santolaya, ensin rastru de la so rellumanza d'antaño, tuvo venceyada Manuela Blanco, la pupila de Xovellanos y que, curiosamente, comparte nome y apellíu col postrer vecín.