Sergio Martín, un inxenieru forestal apasionáu pola artesanía en cerámica

'Bardial Cerámica' ufierta elementos de la cultura asturiana tresformaos n'adornos

Sergio Martín Castro moldea una pitina en malapenes 30 segundos y, dempués déxala secar, conviértela nuna pita pinta asturiana, que pue convertise nun colgante o unos pendientes. Al traviés de 'Bardial Cerámica', esti inxenieru forestal comercializa les sos pieces con inspiración na cultura asturiana.

Va dos años descubrió qu’esta disciplina apasiónalu y fízolo por casualidá: regaló-y a la so pareya un taller de cerámica y aldovinen quién esfrutó más del regalu.

Pa los más atrevíos, creó la gargantiya colos elementos del pote o’l cachopu o los pendientes madreña.

Si te presten los sos diseños, pero non tanto como pa colgalos pel cuerpu, atención a estos cuadros colos instrumentos musicales tradicionales o a les caxes horru. Anque él atrévese hasta cola boda vaqueira reconoz qu’hai diseños que se venden meyor qu’otros.

Trabayen ensin moldes, por eso cada pieza ye única. Entá nun tien, anque ta naguando por él, un fornu de so.

Como nun ye too vender, les sos pieces más marítimes puen vese hasta’l 7 de xineru n’Acuña Espacio de Arte, en Lluanco. Pa esta amuesa fizo la so pieza más grande. Tou un símbolu del conceyu.