Sigue la fuelga nes ITV asturianes

Los sindicatos defenden que se necesiten darréu 30 nuevos mecánicos

La fuelga nos nueve parques d'inspección técnica de vehículos (ITV) sigue güei per segundu día consecutivu dempués de que'l comité d'empresa y la dirección de la empresa pública encargada de la so xestión nun llegaren ayeri a nengún alcuerdu, anque sí se plantegó una ufierta que ta siendo oxetu de votación esti vienres por parte de los 170 emplegaos d'ITVASA.

Tres seis hores de xunta nel Serviciu de Solución Estraxudicial de Conflictos (SASEC) dambes partes nun llegaron a nengún alcuerdu, anque dende la Conseyería d'Industria llanzóse una nueva propuesta cola que'l comité d'empresa nun ta d'alcuerdu, pero que decidió someter a votación de la plantiya.

Un voceru del comité de fuelga señaló que nun van detallar esa propuesta hasta que remate la consulta güei pero que, seya como seya, ésta nun inclúi compromisos de contratación nin una llende temporal pa la realización d'hores estres, tamién en sábados, que plantega la empresa pública.