Sofía González Berdasco ye guía turística en Somiedu

Acepta la presencia del llobu na naturaleza

Sofía González Berdasco recuerda la so infancia con una sorrisa, ente L.lamardal, en Somiedu, y Santa Marina, en Miranda. Tenía dos residencies porque ella ye vaquera d’alzada.

Sofía collaboraba cola so familia na cría del ganáu. Recuerda bien cuando foi la primer vegada que se topó con unos llobos, cuando malapenes tenía cinco años. Sintió mieu y refugu. Sicasí, col pasu los años, foi aceptando la so presencia na naturaleza y, esta evolución valió-y pa protagonizar dellos documentales.

La so vida foi una evolución. Decidió alloñase de Somiedu pa conocer otros requexos y modos de vivir, pero volvió a casa, non pa dedicase a la ganadería, sinón p’amosar los encantos del so conceyu.

Ente esos encantos colos que cuenta Somiedu ta l’osu. La primer vegada que vio un exemplar taba acompañada de la so hermana. Reconoz que s’emociona cuando algama que los sos veceros miren a esti animal en llibertá, anque nun ye fácil dar con ellos.

Sofía reconoz que la so infancia, apegada a la naturaleza, ye la que la condicionó p’agora, dende otru prisma, esfrutala y amosala a los que visiten Somiedu.​