Somos Uviéu pide contratar una empresa esterna pa fiscalizar los contratos del casu Enredadera

Un informe d'intervención pon en dulda que puea facese dende les oficines municipales

Nel Conceyu d'Uviéu, Somos quier que se contrate una empresa esterna pa fiscalizar los contratos rellacionaos col casu Enredadera

L'informe d'Intervención pon en dulda la validez del alcuerdu de la Xunta de Gobiernu pa pidir la fiscalización de los contratos de la Policía Local y del Serviciu de Bomberos.

Apunta a que podría ser “causa de nulidá por falta de competencia” y alvierte de posibles “consecuencies llegales”.

Nel escritu esplícase tamién que'l volume de contratos a revisar, correspondiente a la última década, podría llevar dellos años de trabayu colos actuales medios de los que dispón el serviciu d'Intervención.

Nel so informe, l'interventor conseña amás que los contratos qu'agora piden revisar, yá fueron fiscalizados nel momentu de la so axudicación.

Dende l'área de Seguridá Ciudadana prefirieron nun facer declaraciones. Anque dexen entever qu'esisten otros calces alministrativos pa siguir alantre col análisis de los espedientes nos que participaron los tres funcionarios implicaos na Operación Enredadera.